مهارات الحياة | استعدادت السنة الجديدة 2015 ! بداية جديدة للتغيير✨

by - 3:06:00 م


مرحبًا بكم يا أصدقائي~ 

كيف شعوركم بآخر أيام 2014 ؟ متحمسين للسنة الجديدة وعطلة منتصف السنة؟ 

بداية السنة هي فرصة رائعة جدًا لو استغليناها وخليناها بداية للتغيير! 
صح هي مثلها مثل بداية أي شهر أو حتى بداية يوم لكن الفرق فينا إحنا وكيف بنتعامل معها ونعطي أنفسنا الطاقة الإيجابية والإيمان الكافي عشان نقدر نحولها إلى سنة جديدة سعيدة مليئة بالإنجازات وتحقيق الأهداف 

كلنا نبدأ السنة الجديدة بطموحات كبيرة ونآمل إنها تكون أفضل من سابقتها وهذا الشيء بيدنا قبل كل شيء لذلك ليه ما نخلي آمالنا هي واقعنا ونبدأ بجدية نحط أهداف ونشتغلها عليها ! 

أنا وحده من الأشخاص اللي دائمًا متحمسة لبداية السنة الجديدة بس كل أهدافي أبعد من أن تتحقق أو نقدر نقول إني ما عملت عليها أصلا عشان تتحق.....
لذلك في بداية 2014 غيرت كل شيء وبدأت بداية جدية نوعًا ما و 2015 إن شاء الله بتكون سنتي الثانية وبهذه التدوينة بذكر لكم بعض الأفكار والإستعدادات اللي قررت أنفذها هذه السنة وتجربتي السابقة في العام الماضي..



* ترتيب جديد للغرفة !

هذه أول فكرة قررت أسويها العام الماضي فعًلا كان تأثيرها كبير جدًا على نفسيتي، كان وضع الغرفة كارثي نوعًا ما وكلها فوضى وظلام، منظر كئيب... 
لذلك بدأت أرتبها وغيرت ترتيب الأثاث بحيث النافذة تعطي ضوء أكبر، الضوء ونور الشمس أهم شيء بالغرفة جد يعطيك طاقة إيجابية الصباح وشعور حلو.
مو شرط يكون عندنا أثاث جديد عشان نغير! بس كيف إننا ممكن نغير ترتيبها بشكل يكسر الروتين ويعطينا إيحاء إنها غرفة جديدة هو الأهم، وأضفت أشياء سويتها لنفسي عشان أرتب أغراضي فيها ومن يومها نقدر نقول إني بدأت أحب التنظيم أكثر ومستحيل أرجع للفوضوية بأي شيء بالحياة.. لذلك أول شيء بسويه هذه السنة بعد إني أغير بغرفتي وأطلعها من القالب الروتيني عشان تكون ك البيئة المناسبة للبداية الجديدة.





* Daily Planner


الشيء اللي ما تكلمت عنه بتدوينة التخطيط وأحسه ممكن يكون Time table أوTo do list بنفس الوقت وممكن يكون صديقك المفضل بعد اللي تاخذه معك لأي مكان هههه !
من زمان كنت أفكر أجرب إني استخدمه بس صدقًا هذه بتكون مرتي الأولى
تقدرون تلقون مثله بجرير في ألوان حلوة بعد...
أو ممكن تحولون أي دفتر عندكم إلى منظم يومي بشكل لطيف! 
حسيته بيكون عملي جدًا ومرتب ومفيد وأتمنى يكون بهالفعالية..



* ملف السنة 

تقريبًا فكرته إنه يكون ملف يضم إنجازاتك وأي شيء تسوينه خلال السنة ويكون مرتب حسب الأشهر، السنة اللي فاتت كنت متحمسة للفكرة جدًا بس للاسف ما التزمت فيها حرفيًا.... حطيت فيه أهدافي للسنة وتقييمي وأي ملاحظات على الكتب اللي قرأتها وأي إنجاز، هالسنة بحاول أهتم فيه أكثر وأزيد الأنشطة اللي بتكون فيه، فكرة الملف جميلة جدًا أنصحكم فيها بشدة وأهم شيء ابتكروا فيها حسب إهتماماتكم والأشياء اللي تبون تحققونها هذه السنة..




* Best Memories jar 

هذه الفكرة مشهورة كثير بالمواقع لذلك فكرت أجربها العام الماضي وعجبتني جدًا لطيييفة بشكل ما تتخيلونه! متحمسة أقرأ ذكرياتي ب2014، بتتحمسون وأنتم تكتبون ذكرياتكم وتوصفون مشاعركم وقتها والحلو أكثر إني لما أشوف منظر الأوراق فيها أحس بسعادة إني جمعت هالكم من الذكريات الجميلة! مهما كانت الأشياء اللي فيها بسيطة يكفي إنك ابتسمت وقتها وبترجع تبتسم لما تقرأها، لذلك برجع أطبقها مره ثانية





* تحدي القراءة 

طبعًا ما يحتاج نعيد الكلام اللي يتكرر دائمًا عن فوائد القراءة وأهميتها لكن اللي بقوله شيء واحد بس وهو "اجعلها عادة" وبعدها بتعرف قيمتها بحياتك..
ببداية السنة كان هدفي أقرأ 15 كتاب ب2014 وألزم نفسي بقراءة كتاب واحد في الشهر بعدها بفترة قلت بجرب أحط تحدي قراءة بموقع قودريدز وكان التحدي 18 كتاب بالسنة والحمدلله حاليًا أنهيت 20 كتاب! مجرد ما تتعود ما بتقدر تتركها، لذلك هذه السنة إن شاء الله بيكون التحدي أكبر، نصيحة إذا تبون يكون منظم أكثر استخدموا قودريدز وبعد ما تخلصون أي كتاب اكتبوا ملخص واتركوه بملفكم بيحسسكم بشعور الإنجاز..



* أهداف السنة

وصلنا لآخر وأهم نقطة بكل التدوينة وبدونها تقريبًا ما بينجح شيء! لازم تكتب على الأقل 20 هدف للسنة الجديدة، أهداف تقدر تحققها بخلال سنة وبنفس الوقت تكون عظيمة وتتمنى تحققها بأسرع وقت ممكن وهذا الشيء بيحفزك تطبق أي فكرة من الأفكار السابقة لأنها كلها بتكون مترابطة ببعض، بعدها اترك هذه الورقة ك أول صفحة في ملفك...
هذه الفكرة بعد طبقتها العام الماضي والحمدلله لما قرأتها أمس لقيت إني حققت 17 من أصل 20 هدف وما تتخيلون كيف سعيدة بنفس والتغيير اللي صار لي..
لذلك ابدأوا اكتبوا أهدافكم وآمنوا بقدراتكم وأنجزوا وخلوها سنة مميزة! 

-

ختامًا أتمنى هذه الأفكار أعجبتكم وألهمتكم تبدعون وتبتكرون إستعداداتكم الخاصة، ونرجع نقول التغيير ينبع من داخلك ك شخص مو من تاريخ أو شيء محدد بس كوننا نربط هذول الشيئين مع بعض بيطلع بنتيجة إيجابية كبيرة لذلك ليه ما نستغلها! 

شكرًا لوقتكم وأتمنى لكم سنة جديدة سعيدة ومُختلفة
وإذا حبيتوا التدوينة وحسيتوا إنها ممكن تفيد شخص ثاني شاركوها ! 


You May Also Like

3 التعليقات

  1. تدوينة ججميله , ذكرتني بموضوع السنه الجديده اللي كتبت نصه ونسيته :)
    ححبيت فكرة علبة الذكريات وتحسفت اني تو اعرفها سنة 2014 مليانه ذكريات جميله لي , وكنت اتمنى اكتبها بوقتها
    القراءة كانت من اهدافي بنص سنة 2014 لكن للإسف ماخلصت غير اقل من نصف الهدف , وهذي شي محبطني لكن لا بأس , اقدر اعوض بالسنه الجديده
    وحبيت فكرة الملف , لكن بما اني كسوله , افضل اني كتب اهداف السنه بالمنظم اليومي , لكن راح اطبق فكرتك لكن بدفتر اكبر , عشان تحتوي على انجازات سنه او اكثر
    شكرا على افكار الملهمه , كل تدوينه اطلع فيها بفايده

    ردحذف
  2. موضوع رآئع ..
    وعك حق، الإشتراك في موقع Goodreads يساعدكِ كثيرًا لتحقيق هدف القرآءة ..
    إن شاء الله تحققي أهدآفك لعام 2015 ^^

    ردحذف
  3. رائع جدا دايما كلامك يحفزني ع التغييير اهنيك ع كذا اسلوب اتمنى اطببق هالتتدوينه بحياتي مع السنه الجديده الان احس كذا راح يكون لحياتي معنى شوي *شكرا مريم جدا شكرا من الاعماق*💝💝💝

    ردحذف

Instagram