مهارات الحياة | خطط، نفذ، انجز أكثر! (إنجازاتنا الصغيرة بداية لمستقبل عظيم)
مرحبا ~
ههههه بدايةً خطرت ببالي فكرة هذه التدوينة لما كنت أشوف تو دو لست حقتي وأشوف المهام المُنجزة لليوم وكيف كنت مستمتعة بكوني خلصتها حسيت وقتها بشعور حلو استوقفي ففكرت بأهمية هالشيء بحياتي وكيف كان أثره علي من وقت ما ألتزمت فيه لذلك حبيت أشاركه في مدونتي...
* تنبيه: ما تحويه هذه التدوينة هو أفكار شخصية مستوحاة من تجارب وقراءة وليست نصائح أو قواعد ثابتة مملة، مجرد أفكار أحسست إنها ممكن توعي شيء بداخلك وتأثر عليك إيجابًا في سبيل تحقيق أهدافك بما إني مؤمنة بإن القراءة في هذه المواضيع لها دور كبير صقل شخصياتنا وإيجاد هدفنا السامي في الحياة مهما كانت بساطتها بس تأثيرها النفسي كبير جدًا وأتمنى كل شخص يقرأ هذه التدوينة يوصله الهدف ولو بأدنى فكرة إيجابية.
التخطيط جزء مهم بحياتنا وتلقائي، أي فعل نقرر نسويه بالمستقبل يعتبر مخطط وحياتنا تقريبًا دائمًا تكون ماشية على مخطط روتينا اليومي وهنا تكمن مشكلتنا..كيف؟ لأنه عند الأشخاص اللي ما تعودوا يحطون خطط ثابتة ليومهم بيصير عشوائي وملخبط وبيخلص اليوم وإحنا ما أنجزنا ولا شيء وبآخر المطاف نلقى أنفسنا مضغوطين وبوضع صعب، لذلك مفهوم التخطيط الأصح هو إن إحنا نحدد خططنا سواء كانت يومية أو أسبوعية أو حتى شهرية ونرتبها ونمشي وفقها والترتيب والتنظيم جزء لا يتجزء من تخطيط المهام..
كثير أشخاص يكرهون التخطيط المسبق لليوم بحجة إنه يقيد أو مثلاً بحجة إن إحنا ما نقدر نخمن أيش ممكن يصير بكرا أو بعده، لذلك أنا أقولك أولاً واحد من أهداف التخطيط هو التقيد والإلتزام لأنك لما تلجأ للتخطيط معناه إنك محتاج إلتزام أكبر في أداء مهامك، وثانيًا صح إحنا ما نقدر نعرف أيش ممكن يصير بأيامنا الجاية بس نقدر نحط خطة مبدئية وحتى لو حطينا خطة وصار ظرف وتأجلت هذا لا يعني فشل أو خطأ، دائمًا لازم يكون عندنا ألف احتمال واحتمال بس هذا لا يعني إننا نحط يدنا على خدنا ونضيع الوقت بهالحجج الواهية! وطبعًا هنا تكمن فائدة المخطط المرن وتوزيعنا للمهام
في طرق كثيرة عشان ننظم يومنا ونستغله بشكل أفضل وأهم طريقتين من وجهة نظري هم الجداول والقوائم، وأقصد بالجدول هو اللي نكتب فيه كل الأشياء اللي قررنا نسويها سواء يومية أو أسبوعية أو حتى شهرية وغالبًا تكون روتينية ويُفضل إنها تكون محددة بوقت، كثير فاهمين هالفكرة غلط وإنه صارم جدًا! لما تحط لنفسك جدول أعمال ما يعني إنك تكتب كل شيء بالساعة والدقيقة وتلزم نفسك تعيش ك روبوت! دائمًا اللي يأخذونها بهالطريقة تفشل معهم بسبب إنه ممكن تصير أحداث وتخرب كل الخطة وهذا يدل على إن أساسها غلط
طيب كيف نتفادى هذه الأخطاء ونخلي جدولنا يكون مرن؟
أولاً لازم يكون عدد المهام حسب قدراتنا مهما كان إحنا بشر وممكن نتكاسل نهمل أو نمل! لذلك لازم نوزع المهام على أيام الأسبوع بدل ما نضغط على أنفسنا.
ثانيًا توقع أي حدث مفاجئ، التهيئة النفسية للظروف الدخيلة على خططنا مهمة جدًا، ضع أكثر من إحتمال واترك ساعات فراغ كافية.
ثالثًا لا تحرم نفسك من الترفيه وخصص جزء من وقتك للمتعة رياضة, قراءة, أو تأمل, ممارسة هواية, أو أي نشاط تستمتع فيه.
ومو بس المتعة لها وقت حتى العبادة لازم يكون لها جزء من يومنا..
وتذكر إنه لو فاتك عمل ما سويته اليوم هذه مو نهاية العالم وهذا شيء وارد جدًا إلى أن تتأقلم مع جدولك..
وهذه النقاط تنطبق على قائمة المهام أيضًا واللي هي تشمل المهام المستحدثة على حياتنا، جدًا عملية ومفيدة وتحمسك تنجز أكثر وبالنسبة لي أفضلها على الجدول، قائمة المهام معتمدة على ترتيب المهام حسب أولويتها ويفضل لو حددت وقت إنتهاء للمهمة للحد من التأجيل والتكاسل، وممكن تكون أسبوعية أو يومية حسب استخدامك وفي أفكار كثيرة لتقديمها بصورة جميلة ومُحفزة
الألوان والزينة تحفزنا أكثر، وتنبهنا على مهامنا أكثر
آخر قائمة مهام كتبتها ههههه حوسة
* وجود تقويم بالغرفة مهم للتذكير بالأعمال والمواعيد والملاحظات، وجوده جدًا أساسي..
مثلاً تطبيق Any Do عملي ومنظم وممكن تسجل دخول فيه بأي جهاز بالإضافة للتنبيهات والتذكير.. أيضًا في كثير تطبيقات Time Table وحتى في تطبيقات جامعية ممكن تحط فيها اختبارات، محاضرات، مواد، وأي شيء..
* تذكر دائمًا إن التأجيل عدوك اللدود لا تخليه ينتصر عليك بسهولة!
آخر نقطة بتكلم عنها إنه ممكن تستغربون ليه ربطت التخطيط البسيط هذا بالمستقبل العظيم! أو يمكن ما أقنعكم لذلك بذكر لكم مثال بسيط وهو الكاتب التركي عزيز نيسين واقتبست قصته بتصرف من كتاب "في أحضان الكتب لبلال فضل" وهو كاتب خلف ورائه مئة وعشرين كتاب ومئات من المقالات، عدد ضخم جدًا وكان السر ورائه إنه كان يكتب كل مهامه على قصاصات ورقية صغيرة وكان من ضمن هذه المهام الكتابة طبعًا ويوم بعد يوم استوعب أهمية هذه القصاصات بحياته ولقى نفسه بين عباراته اللي كتبها عليها وقرر إنه ما يرمي هذه القصاصات ويحتفظ فيها في ملف باعتبارها تاريخه الثمين
جديًا هذه القصة من أكثر الأمثلة المُحفزة بحياتنا لو تأملتوها ولا تنسون تتأملون بساطتها وكيف إنها بمتناول الجميع وممكن أي شخص تكون بدايته من هذه الفكرة...
ختامًا، صدقوني كثير أوقات نضيعها بسبب تهاوننا في التعامل مع الوقت وعشان ما يجي اليوم اللي نندم فيه إن إحنا ما استغلينا وقتنا بأشياء تفيدنا لازم نبدأ نخطط وننظم وننجز أكثر، يمكن أداء مهمة اللحين ما يعني لنا الكثير لكن بعدين بنعرف إن هذه المهام والأشياء البسيطة اللي سويناها أسستنا ووجهتنا لأهدافنا الكبيرة وغيرت من مستقبلنا، إرتباطها وثيق وعميق حتى لو ما كان واضح..
لا تضيع وقتك واستغل كل لحظة بفعل أشياء إيجابية واحتفل بأصغر
إنجازاتك لأنها بداية مستقبلك العظيم❤
6 التعليقات
السلام عليكم
ردحذفهذي أفضل تدوينة كتبتيها حتى الآن بوجهة نظري ههههه
والسبب هو اني انسانة فوضوية ويومي ددددايم يروح بدون ما اسوي شي يفيدني بس على قد ما يروح نوم و مذاكرة بدون اي نشاطات ثانية :( .
((لأنه عند الأشخاص اللي ما تعودوا يحطون خطط ثابتة ليومهم بيصير عشوائي وملخبط وبيخلص اليوم وإحنا ما أنجزنا ولا شيء وبآخر المطاف نلقى أنفسنا مضغوطين وبوضع صعب))
صححححح صح فعلا , مع الاسف اني من هالعينة من الاشخاص :(
اعجبتني فكرة المخطط المرن وان شاء الله اني بابدأ اطبقها , احسها بتفيدني كثير خصوصا اني عجازة و مافيه انسان يؤجل اشغاله كثري هههههه
اوافقك الرأي مع اني ما عمري استخدمت التقويمات ولا قوائم المهام لا الورقية ولا الالكترونية بس احس ان الورقيه امتع , و ان شاء الله اني باحمل هالتطبيقات ,
شكرا عالتدوينة المفيدة حمستيني ♡
أسعدني تعليقك جدًا وبكون أسعد لو فعلًا استفدتي من تطبيق هالأفكار وغيرت حياتك💕 و شكرًا لدعمك💕
حذفججميل جدا دائما اتمنى انتظم وقتي بقائمه مهام الاسباب اللي تعرضينها الحلول ماتتركين لنا مجال للتحجج اللي جذبني بكل تدويناتك انك تدعمينها بمصادر وقوه انا من النوع اللي عنده قائمه مهام بس وهميه بمخي صدق امشي عليها وانجز بس احس اللي باليد الواقعيه اجمل وامتع نوعا ماا الله يسسعدك راح احاول اطبقهاا مع الاختبارات ك مهام قريبه وصغيره لين اعتاد ع الوضع شكرا ع كذا تدوينه ✋💝💝👏
ردحذفواخيراً قريتها
ردحذفجداً جميلة هالتدوينه وبين السطور احس اني اقرأ اسمي ، من جد التأجيل والتسويف آفة الشباب
قد ما اقدر احاول اني اتخلص منهم
بس التخطيط شيء نمارسه بحياتنا سواء ادنا ذلك وام لا وبنظري انا اعتبر الروتين نوع من انواع التخطيط
والقصة اللي ذكرتيها من كتاب احضان الكتب عجبتني مرررررررررة وافكر اطور الفكرة واطبقها
شكراً على التدوينة الجميلة
موضوعك جميل جدا ومفيد
ردحذفوكأنك لمستي الوتر الحساس , اذا ماكتبت مهمات اليوم ماانجزها حتى لو انها عادات يوميه
مهما خططت شي بمخي , أجله وكأن عندي وقت , غير لما اكتبه
وحبيت القصه اللي بالنهايه , جدا جميل لما احقق انجاز عظيم اشوف المهمات الصغيره اللي أدت إليه , وان شاء الله راح احتفظ بالنوت بوك وماارميه
بديت اطبق الفكره , قبل يومين , ويومي ترتب اكثر من قبل وأنجزت اشيااء من زمان مأجلتها , شكرا على تدويناتك الجمييله
حبيت ربي يسعدك
ردحذف