طبخ | اللقيمات المريميَة ~
السلام عليكم
شلونكم وشخباركم؟ ياه مرت الأيام بسرعة وعشنا جو الصدمة السنوية اللي كلنا متفاجئين إنه خلاص جاء رمضان هههههه!
عمومًا أتمنى لكم رمضان سعيد مليء بذكر الله والأجواء الروحانية والله على قيامه وصيامه وما ينتهي قبل ما نحس إننا راضين عن أنفسنا وكيف استغليناه ❤ خططوا لأهداف جيدة وانشروا الخير حولكم وابتسموا واستشعروا معنى رمضان..
نرجع لموضوعنا اللي هو اللقيمات، الجزء الأهم في سفرتنا الرمضانية ومن اللي ما يحبه؟؟؟ عاد اللي يعرفني من قبل يعرف إن هذا ثالث رمضان بصير أسوي اللقيمات رغم التحطيمات والتعليقات اللي تجيني على الأشكال العجيبة والكبيرة اللي أسويها بس لازلت أعاند وأسوي هههههه:( المهم الطعم مو لازم يكون كرات صح؟
أصلا يكفيني إن جدتي عززت لي وقال إنه لقيماتي شزينه ما فيه شيء، يا حبيبتي هي❤ هههه تدوينة سوالف
واليوم سويت لقيمات للمرة الأولى هذه السنة استعدادًا لرمضان واكتشفت إني احتاج تدريب مطول مرة ثانية لأني نسيت شلون:(وهذه وصفتي اللي ألفتها بنفسي بس لذيذة والله ❤
المقادير:
* كوب ونصف دقيق أبيض
* ملعقة كبيرة خميرة
* بيضة
* ملعقة صغيرة بيكينق باودر
* نصف كوب حليب
* ملعقتين سكر
* رشة ملح
* ماء للعجن
نخلط المكونات الجافة مع بعض
نضيف بيضة عشان يكون طري، ونضيف الحليب بعد
نضيف ماء إلى أن نصل للقوام المطلوب
نتركه كم ساعة إلين يختمر وتطلع الفقاعات
نشكله ونقليه بالزيت
ونقدمه مع الدبس أو العسل أو الشيرة وبالعافية❤
آخر شيء بسألكم تيم الطباخون ولا النائمون؟ منو الرفلة ومنو السنعة؟ 😂😂😂وأرجع أقول لكم كل عام وأنتم بخير وينعاد علينا وعليكم بالخير والبركة ~
شكرًا لوقتكم~
3 التعليقات
بطلله والله 👏 تسويينه بطحين بعد مو الجاهزه ماششالله عليك مبدعه ! نتعلم منك 🌚👏
ردحذفو اخيراً قريب التدوينه، وصفه بسيطه و سهله و ان شاء الله اجربها قرييب❤️
ردحذفشكلها لذيذه . بس مشكلتي اخاف من الزيت ماتنفع بالفرن؟ وكل عام واني بخير يا مريميه اللطيفه
ردحذف