منوع | College morning routine + How to be a morning person! 🌞
وأخيرًا بعد إنقطاع طال آمده جدًا سعيدة إني أكتب تدوينة جديدة وبتخلص من شعور الذنب الذي كان صديقي الثلاث أسابيع الماضية، افتقدت المدونة وافتقدكم ودعمكم وكلامكم المُحفز💔
كأنها قلبت دراما؟ 😂
نعود لموضوعنا الأساسي وهو روتيني الصباحي وأشياء ممكن تخليك شخص صباحي ويصير وقتك المفضل باليوم وتستمتع فيه ✨
خلونا نبتسم كل صباح ونتفائل وندعي إن الأشخاص الكئيبين صباحًا يختفون خاصة اللي يعكرون صفو جونا أوقات الدوام 😂💔
بداية صباحي الدراسي يبدأ الساعة ستة أقوم وك ٩٩٪ من الناس هالأيام أول شيء أمسكه جوالي 😂 وبعدين فجأة أستوعب إني تأخرت وأنط من سريري وأتروش وأصحصح بعدين أنزل أشرب كوبين ماء، من زمان تعودت هالعادة وأحسها مفيدة جدًا لذلك جربوها🚶 وأجهز فطوري للدوام لأني ما أحب أفطر وأنا توني صاحية 😂 بعدين أرجع فوق وألبس وإذا كان في وقت وأنا رايقة أحط ميك اب بس في الحقيقة والواقع أحط بيبي كريم ومرطب وألبس عبايتي وأنزل ركض 😂 طبعًا كل هذا لازم يخلص قبل ٦:٥٠
بعدين أفتح جوالي وأقرأ بالطريق عشان ما أحس بالوقت وأستفيد بدل تأمل شوراع الجبيل 😂 فجأة أنتبه لنفسي إني وصلت وادخل وأمشي إلى مبنى سي وأنا مبتسمة وأسولف مع نفسي مرات بدون ما أحس، إذا شفتوني سووا أنفسكم ما انتبهتوا 🏃
بعدين أقعد بالكافتيريا أسولف وأتحلطم مرات وألعب بجوالي، حتى وأنا مداومة غصب حب الصباح والطاقة الإيجابية اللي فيه تنسيني 😍
ياه تدوينة سوالف 🚶💔
بس طبعًا صباح عطلة الأسبوع والإجازات + الإجازات المريمية مختلف 😂
طيب كيف نكون أشخاص صباحيين؟
أولًا النوم لوقت كافي خاصة إذا كان عندك دوام ويوم طويل يحتاج طاقة كبيرة
ثانيًا خذ وقتك وأصحى قبل بوقت مو كل شوي غفوة إلين يبقى ١٠ دقايق ويبدأ التوتر والتنفيس😂💔 صح صعب بس إذا تعودت عليه بتحس بالراحة✨
ثالثًا ابتسم ابتسم ابتسم ابتسم
🐼 ليه النكد وأنت عندك مليون سبب يخليك تبتسم؟؟؟ مهما كانت أسبابك دائمًا خلي بداية اليوم بداية جديدة لك وانسى أي شيء ممكن يعكر مزاجك واستمتع بهذه اللحظات!
إبدأ يومك بمشروبك المفضل كوب قهوة مثلاً وصحصح وروق وخطط ليومك وخلي عندك هدف
تأمل الطبيعة والغيوم والشمس تحديدًا يعطي طاقة إيجابية كبيرة لذلك أحس المشي الصباح والإسترخاء سبب مهم يخليني أحب الصباح😭💕
نفذ أعمالك صباحًا وخلك من التأجيل واستغل طاقتك الكبيرة بداية اليوم حتى المذاكرة أريح الصباح...
استمتع! حرفيًا استمتع حتى بالأشياء العادية ما فيها شيء لو استهبلت قدام المراية وأنت تفرش أسنانك أو مشيت وأنت تتذكر سوالف غبية وقعدت تضحك 😂 هذا وقتك ولازم تعرف كيف تستمتع فيه وما في أي شيء يمنعك
خلونا من النفسيات الكئيبة والوجوه اللي كلها نوم 😂💔
دائمًا حفز نفسك حتى لو تلصق هذه العبارات قدامك عشان تقرأها كل صباح وسوي نشاطات المفضلة إقرأ ارسم مارس الرياضة اكتب بس أهم شيء تتحرك من سريرك وتنسى الكسل 😂
تكلمت كثير بس إلى الآن ما أحس إني أوفيت الفكرة
حقها، بس بجدية الصباح هو اللي بيحدد بقية يومك لو استغليته صح، جرب تصحى وتخلق من نفسك شخص ثاني الشخص اللي أجلته من سنوات اللي أنت دائمًا مشغول بالتفكير كيف أنت بتكون هو!
ختامًا في إقتباس أعجبني من دراما وهو إنه إذا يأست من الحياة وفكرت بالانتحار أجله إلى اليوم اللي بعده وإذا فكرت بالانتحار مرة ثانية أجله بعد إلى أن تصل لليوم اللي يخليك تقول الحمدلله إني ما انتحرت أمس! يكون هذا اليوم اللي حلمت فيه دائمًا....
ما بنوصل لمرحلة الانتحار بس تأملوا فكرته ولا تعلقون أخطاء اليوم السابق باليوم الجديد
أتمنى لكم أيام سعيدة وصباحات مشرقة ورائعة💕
استمتعوا وشكرًا لوقتكم 💕
إذا أعجبتكم التدوينة حاولوا تصيرون صباحيين وشاركوها للناس اللي تكره الصباح😂💔💔
3 التعليقات
افتقدت تدويناتك :(
ردحذفتدوينة لطيفه وخفيفه , انا من عشاق الصباح , تذكرت الايه { وجعلنا النهار معاشا }
واستمتع كثثير لما اصحى الصباح لإنه الوقت الوحيد اللي اقدر استمتع فيه بالهدوء والشمس
الصباح اقدر انجز اغلب مهامي وانا رايقه
جدا اتضايق لما اصحى متأخر , متعة الصباح مايحسون فيها كثير من الناس
وقت الدوام دايم احاول اصحى قبل بساعه او ساعه ونص عشان اصحصح وافطر برواق
أجمل وقت في اليوم الصباح
ردحذفصحيح أصعب شي قومه من السرير بس بعدها كل شي يسهل
أحب الصباح جدا لذلك صرت دجاج وانام بدري بس عشان اصحى الساعه خمسه الفجر سواء وقت دوام او ويكند
الصباح منعش ورايق بشكل ♡♡♡
شكرا يا جمييله على هذي التدوينه ♡
*حذفت ردي بسبب طلاسمي XD *
صصادقه بدايه يومك وصبباحك يحدد مزاجك لليوم كله 👏👏 ع كثر ما قريت ان لما تصحين قبل بوقت افضل لك الا ان الى الان وانا معلقه ما اصحى الا بالوقت الضايع 😐 تدوينه اججابيه جميله ك عادتك تعطين طاقه تحفيزيه جييده يعطيك العافييه ❤️❤️❤️❤️
ردحذف