مهارات الحياة | كيف نخلي فترة الاختبارات إيجابية أكثر؟
مرحبًا بالأصدقاء💖
كيف حالكم؟
ورجعت بتدوينة جديدة بعد أسبوع وأكثر يمكن؟ اختبارات وحوسة تعرفون💔 وتدوينتي بتكون لنفس الموضوع بما إن ليان اقترحت عليّ أتكلم عنه...
وأخيرًا وصلنا لآخر فقرة بهذا الفصل الدراسي وأحس إنها أهم فترة بما إنها بتأثر بشكل كبير على النفسية بالعطلة خاصة إذا كانت الدرجات مو مرضية وأقل من المتوقع بنندم ونتنكد لذلك لازم نقوي أنفسنا ونتحمل هالأسابيع القليلة ونحصل على درجات مرتفعة ونستعد لعطلة طويلة ممتعة
في تدوينتي السابقة تكلمت عن 10 نقاط مهمة لمذاكرة فعالة أكثر واليوم بتكلم في نقاط ثانية وإن شاء الله تحفزكم للمذاكرة وتعطيكم طاقة إيجابية💖
* استغل وقتك :
أول نقطة بتكلم عنها هي الوقت وهو أهم شيء تقريبًا إننا نعرف كيف ننظم وقتنا ونحاول نستغله صح بدل التأجيل وما يترتب عليه من ضغط وتوتر لذلك حاولوا تبدأون مذاكرة من وقت خاصة اللي اختباراتهم بعد أسبوع يعني عندكم وقت كافي تخلصون أكبر قدر من الدروس.
ارفضوا أي عروض طلعات، حفلات، سفر أو أي شيء يضيع وقت كبير! بتستغربون وتقولون ليه هالكأبة لكن بجدية أفضل إنكم تخلونها فترة هادئة بالبيت وتاخذون وقتكم بالدراسة أو أي نشاطات بسيطة لأني الأشياء اللي ذكرتها قبل بتستهلك جزء كبير من طاقتكم بالإضافة إلى إنه ممكن تندمون عليها بعدين:/..
* أعرف الطريقة المناسبة لك في المذاكرة:
جربوا أساليب مختلفة في المذاكرة الين توصل للطريقة الأفضل وإذا كنت شخص ملول مثل حالي حاول تنوع من وقت لوقت، ولازم تعرف تفاصيل عن نفسك مثلًا هل تحب تخلص مادة وتبدأ غيرها أو تحب تبدأ مادة وتغيرها إذا مليت؟ أو مثلًا تفضل تبدأ من بداية الكتاب أو نهايته؟ أشياء مثل كذا ممكن تحسن جودة المذاكرة وفعاليتها.
* الأكل الصحي والنوم الكافي:
نرجع نقول اهتم بصحتك أيام الاختبارات كثير يصيرون يفوتون وجبات أو يروحون اختباراتهم مواصلين وكلنا نعرف تأثيره السلبي عليهم!
لذلك قبل ما تبدأ مذاكرة خلي عندك سناك عشان ما تتكاسل تروح تاكل بس بشرط يكون صحي! ليه؟ لأن السكريات والأكل الضار بخليك خامل وكسول وبتمل عكس الأشياء الصحية اللي بتزيد نشاطك وتركيزك وتؤدي الغرض المطلوب على أتم وجه 🙏
حاول تتجنب المشروبات اللي فيها نسبة كافيين عالية مثل المشروبات الغازية ومشروبات الطاقة والمنبهات عشان تحصل على كمية نوم كافية، السهر أبدًا ما بيطلع بنتيجة لذلك اختار أوقات أفضل مثل الصباح حتى لو كنت شخص ليلي تذكر إنك بحاجة للنوم والطاقة اللي يعطيك إياها.
* التحفيز الذاتي:
أكثر شيء محتاجينه بوقت الاختبارات هو التحفيز الذاتي وبدونه بنكون بوضع سيء، دائمًا أعط نفسك الثقة والدعم الكافي تخيل نفسك وشعورك بالفخر لما تشوف درجاتك مرتفعة وكيف بتكافئ نفسك عليها وتخيل كيف بتكون إجازتك وكيف بتستغلها وهذه المشاعر كافية إنها تعطيك دافع قوي وحماس للمذاكرة، انشر العبارات الإيجابية حولك، وكافئ نفسك على أبسط مجهود تبذله وخذ أوقات راحة كافية واستغلها بأشياء تبعد عنك التوتر وتريحك نفسيًا موسيقى هادئة أو كم دقيقة مشي برا البيت ممكن تحسن نفسيتك بشكل كبير جدًا، وأهم شيء تذكر إن الدراسة وعلمك هي سلاحك بالنهاية.
* تجنب الكلام عن المذاكرة والأشخاص السلبيين:
وحدة من أكثر الأشياء اللي توتر أيام الاختبارات هي حلطمة الغير وكلامهم السلبي، إما بتحس بتقصيرك أو بيساعدونك تصير مهمل لذلك لا تسأل أو تكلم إلا مع أشخاص يحفزونك ويرفعون معنويات وتجاهل البقية، حاولوا تركزون على أدائكم فقط وانشروا الكلام الإيجابي حولكم 💖
وبذلك نكون وصلنا لآخر نقطة بالتدوينة بجدية أتمنى إننا نحاول نغير من الصورة المعروفة لهذه الفترة ونخليها شيء بسيط ويعدي بأفضل نتائج ممكنة
دعواتي لكم بالتوفيق والدرجات العالية إن شاء الله💖
كل الحب والشكر لدعمكم ووقتكم 💖
2 التعليقات
الكثير مننا ما يستفيد من الفتره اللي قبل الاختبارات..
ردحذفاو بالاصح ما يعرف كيف يستفيد ..
نقاط فعاله و مفيدة : )
keep going dear ^^
*بسمة ❤❤
اتمنى لو يفهمون ان لما ما تطلعين وتهجولين بفتره الاختبارات انك مو منفسه و مكتأبه !! دايم اذا قلت ما ابي اطلع يفتحونلي مرشح 😐 هذي الايام تحتاجين اكبر قدر من التركيز ولازم تحافظين ع تركيزك 👌كل كلامك كان جيد معي وطاقه جميله بس علق وجهي عند *حتى لو كنت ليلي 😐😂* بحاول احل مشكلتي 😂 شكرا ياجميله ❤️❤️
ردحذف